De Bello Sidereo

Alexis Hellmer Gives Star Wars True Epic Treatment — In Latin Dactylic Hexameter

[Editor’s note: Alexis Hellmer, Latinist extraordinaire and Professor of Latin language and literature at the Benemérita Universidad Autónoma de Puebla, and at the Universidad Popular Autónoma del Estado de Puebla, in Mexico, also happens to be a fan of Star Wars. Animi causa (just for kicks) he decided to compose some Latin hexameters for Star Wars, as if it were a Roman epic. They’re extraordinary, and when I saw them on Facebook I asked him for permission to publish them here, and now we’re publishing them for the Fourth of May (May the Fourth Be With You). He is using “iedus” as “jedi.” And by the way, the word Newton — and Hellmer! — use for “force” is “vis,” making “may the force be with you” vis sit vobiscum or vis vobiscum.]

[Updated with new verses for May the 4th, 2019, beginning with “sperat enim.”]

DE BELLO SIDEREO LIBER I

Sidereum canimus bellum quo fulgidus aether

flagravit, tum caelivagas naves, decus aevi,

et radiantes iedorum enses, lucida tela;

praeterea ignotos orbes quos continet aura

caelestis, quorum partem tenet horridus algor,

partem, quos flamma torret sol, occupat aestus;

et gentes alienas, saevi Martis alumnas.

Rerum parens Vis, mundum quae numine comples,

nam sine te nihil exoritur in luminis oras,

arride nostris coeptis votumque secunda!

Tempore abhinc multo fuit ingens lacteus orbis

nostro longe semotus; Respublica mundi

mille annos summo viguit moderamine recta,

quippe patres conscripti sancte foederis aequa

inviolataque iura ferebant: omnia namque

pacis agebantur studio, mirabile dictu.

At potiendi auro et dominandi saeva cupido

invasit nonnullos: sic discordia parta

sideribus. Quid non mortalia pectora cogis

auri sacra fames! Respublica contremit omnis

civiles misere quam vexant seditionis

motus. Nam populus tum vectigalia magna

respuit aucta modo, quibus extima sidera mundi

iure petunt mercatores multisque referta

navigia adducunt ultroque citroque per auras.

At princeps mercatorum, nequissimus unus,

obscenum dirumque nefas sub pectore versat:

sceptra tenens dextra et confisus Foederis armis

Nabum orbem parvum obsidione premit improbus arta.

Sperat enim populum bellorum posse coerci

insidiis, itaque tristissima machina multa

letum orbi minitans gentique et plurima navis

circumdat sedes Amidalae, amplissima regna.

Consistunt subito naves in limine portus,

quas cohibent inimici armis navesque minaces.

Legati tunc conveniunt sanctusque senatus,

qui mundum cunctum, qui gentes legibus aequis

temperat: undique fit clamor rebus super hisce.

Interea prudens equites Iedos vocat, armis

insignes, cogit quos Cancellarius amplus

hostium adire rates, pacemque bonumque tueri.

Edicto parent equites: leguntur ad hanc rem

Iedorum ex turma duo: Quigonusque magister

egregius, iuvenisque armis Kenobius acer.

Extemplo arripiunt enses navemque paratam

conscendunt. Cursu celeri alta ad sidera tendunt.

Adveniunt tandem legati ad Principis aulam

aetheriam. Automaton forma atque humana figura

factum ducit eos conclavia ad intima navis,

exspectare iubet equites illosque relinquit

inclusos. At quid non sentit pectore Iedus?

Praesagit etenim tectam Kenobius astu

fraudem. Nam Princeps, aequi pacisque inimicus,

inservit domino Sidio, qui non superatur

ulli perfidia (tantum ardet pectore noxae)

et sceleris omnis merito princepsque paterque

dicitur. Hic Sidius Iedis cladem meditatur

horribilem: claudit portarum ingentia claustra

et subito totum conclave vapore repletur

mortifero. Fugientes sed mora nulla retardat:

arripiunt enses, vi fulminis arma corusca.

Automatum manus equites prohibere iubetur.